Нєзависне дружтво новинарох Войводини,
Нови Сад,
17.06.2005. року, 18 годзин
УЧАСТВОАЛИ:
Драган Босилькич, руководитеь одзелєня за приватизацию Аґенциї за приватизацию
Слободан Дьорич, член Совиту Републичней радиодифузней аґенциї
Драґан Миланович Пилац, ЗКС «Нєзависносц»
Динко Ґрухонїч, предсидатель НДНВ
Драґан Босилькич:
Приватизацию друкованих медийох дефинує Закон о явним информованю, котри правда нє спомина експлицитно обовязку приватизациї друкованих медийох, алє спомина кеди зоз роботу преставаю дружтвени и явни медиї. Як знаце, то було 22. априла и, хвильково, друковани медиї робя у єдней файти правного вакууму. Дораз ше мушим оградзиц и повесц же нїхто зоз нас ту присутних нє виновати пре то, зоз оглядом на то же друковани медиї чийо снователє локални самоуправи у ствари - державни медиї, односно власносц Републики Сербиї. Инициятиву за их приватизацию мушело порушиц Министерство култури Републики Сербиї. Тото Министерство ше медзитим по април того року кед ше рок за приватизацию приблїжел на два тижнї, нє оглашовало з тей нагоди. Аж теди порушана инициятива за предлуженє того року.
У медзичаше, Аґенция за приватизацию и Министерство за привреду мали розгварку зоз Министерством култури. Догварене же би, без оглаяду на правни вакуум у котрим функционую друковани медиї, Аґенция и Министерство за привреду порушели инициятиву за приватизацию друкованих медийох у явней односно державней власносци. То ше нє одноши на мишани медиї, односно електронски медиї котри маю и друковани виданя. Пре то тераз можеме повесц же, кед слово о друкованих медийох, вецей нє постоя процедурални препреченя. Аґенция за приватизацию у процесу идентификованя друкованих медийох на терену, зоз оглаядом на то же нє постої єдинствени, официялни, державни реґистер медийох зоз котрого би ше могло достац податки. Податки збераме прейґ наших локалних канцеларийох у Новим Садзе, Краґуєвцу, Кралєву и Нишу. Тиж так их збераме и зоз помоцу локалних самоуправох котрим зме ше явели зоз циркуларним писмом. Даєдни нам одвитовали, велї нє, алє процес почал цо и найбитнєйше.
Треба спомнуц же за приватизацию друкованих медийох, алє и електронских, треба мац согласносц Влади Сербиї, зоз оглядом на то же ше роби о медийох у державней власносци. То компликує процедуру. Прешлого тижня на схадзки Влади «прешла» перша ґрупа штирох друкованих медийох: «Ґлас комуне» зоз Апатину, «Вршачка кула» зоз Вршцу, «Княжевац» зоз Княжевцу и «Наша реч», зоз Лесковцу. То, практично перши штири явни медийни подприємства котри рушаю до приватизациї, а ми обчекуєме же пошвидко будзе порушена инициятива за приватизацию ище коло дяешец медийох.
Аґенция за приватизацию ше находзи у дакус незґодней ситуациї, пре то же ше скорей зк цо ше войдзе до процесу приватизациї, муши достац согласносц локалней самоуправи и министерства (култури). Вироятно будзе поставенме лоґичне питанє; цо кед локална самоуправа нє да согласносц. Нашо же би зме тоту согласносц глєдали, а кед же ю вони нє даю, ми будземе примушени же би зме, и без их согласносци, пре рок за приватизацию, по автоматизме порушели инициятиву за приватизацию.
Кед слово о електронских медийох, шицки знаце же их приватизацию дефинує закон о радиодифузиї. Односно закон о радиодифузиї одредзує способ и процес приватизациї електронских медийох, алє гвари же ше блїзши одредби и правила одредзую зоз правилнїком котри ма принєсц Министерство култури. Ту зме мали проблем пре то же ше Министерство култури у претходним зволаню републичней Влади, по власним признаню, нє пренашло у тим законским члену, односно вони думали же за правилнїк компетентне Министерство привреди. То ше одцагло, пришли виберанки, пришли нови людзе до Министерства култури... Шицко то длуго тирвало, а вец видата єдна верзия правилнїк котру, медзитим, зоз становиска приватизационей процедури нє було можлїве рализовац! Єдноставно, нє бул компатибилни зоз приватизациону процедуру и практично знєможлївйовал же би ше вообще и вошло до приватизационей процедури. Проблем, скорей шицкого, бул у тим же правилнїк, як предмет приватизациї, дефиновал лєм гевти медиї котри свою роботу усоглашели зоз Законом о радиодифузиї, а то практично значи же би до процесу приватизациї могли войсц лєм гевти медиї котри на тендеру за фреквенциї, котри розписує Републична радиодифузна аґенция, достали фреквенцию и котри, практично, робя леґално. Зоз оглядом на то же була, як познате, велька ґужва у вязи зоз вибором Совиту РРА - сами знаце цо ше ту шицко случовало! - пре политични потрешеня розписованє тендеру за фреквенцї стално предлужоване. То нас приведло до ситуациї же рок за приватизацию у юлу 2006. року, а, по думаню пана Слободана Дьорича, тендер за фреквенциї будзе розписани аж з початку 2007. року. Пре то перши правилнїк нє могло реализовац.
Же би превозишли нєзґодну ситуацию, Аґенция за приватизациюю, вєдно зоз Мисию ОЕБС-а, порушела инициятиву и вивершела прицисок на Министерство култури же би ше правилнїк цо скорей вименєл. Направели зме и предкладанє нового правилнїку. Пред трома мешацами мали зме перше, барз квалитетне сртетнуце, на котрим були представителє РРА, Министерства култури, Аґенциї за приватизацию и Мисиї ОЕБС-а, и почало усоглашованє нового правилнїку, котри практично закончени пред двома тижнями, а прешлого тижня го потписал министер Коядинович. Обчекуєме же пошвидко будзе обявени и у Службеним листу, та би, пошвидко после його обявйованя, Аґенция за приватизацию могла почац приватизацию електронских медийох.
У новим правилнїку ше находза одредби котри оможлївюю приватизацию електронских медийох без додзельованя фреквенцийох. Аґенция за приватизацию ма думанє же зоз тоту одредбу у правилнїку гевтим локалним медийом котри у подлей финансийней ситуациї оможлївюєме же би зоз приватизацию обновели технїку и же би були у вельо лєпшей позициї на тендеру за фреквенциї.
Кед слово о других одредбох, найважнєйша гевта котра реґулує же нови власнїк муши найменєй пейц роки предлужиц континуитет продукованя и емитованя, окрем кед же на тендеру нє достанє фреквенцию за емитованє: з тей нагоди мож пременїц дїялносц подприємства.
(...)
Питанє зоз публики:
Цо ше случує зоз маєтком медийох? Велї медиї маю проблем зоз роботним простором.
Драґан Босилькич:
По IREX-овим виглєдованю, 90 посто медийох чий снователь локална самоуправа нє ма свой маєток у смислу нєрухомосцох, алє су хаснователє општинских будимкох. Єст вецей вариянти: найлєпша кед маєток у догварки зоз општину преруцице до власнїцтва медия - то будзе вельке спонукнуце за приватизацию, односно медий будзе вельо атрактивнєйши за предай. Кед же то нє можлїве, вец предкладам же би сце направели добри контракт о закупу скорей приватизациї, и то на длукши рок. Направце, поведзме, контракт зоз општину о закупу на поведзме двацец роки без надокнади, односно плацайце простор през компензацию зоз оглашками. Општина по закону о локалней самоуправи длужна же би ше обрацала гражданом, длужна є же би ше оглашовала.
Питанє зоз публики:
Думам же питанє фреквенцийох барз важне и думам же тота цена електронским медийом будзе вельо векша кед вони скорей приватизациї достаню фреквенцию. Можебуц би перше требало подзелїц фреквенциї, а вец аж войсц до приватизациї?
Драґан Босилькич:
Рок за приватизацию електронских медийох йул 2006. року. А по дзепоєдних преценьованьох аж концом 2006. лєбо з початку 2007. року будзе розписани тендер за фреквенциї.
Питанє зоз публики:
То значи же ше зменшує вредносц медия! Пре то же купованє медия яґод купованє мачки у меху.
Драґан Босилькич:
Кажди медий досцигнє свою тарговишну вредносц, то увидзице. Анї Б92 нє мал свою фреквенцию кед му приватияоване 30 одсто капиталу, та посцигнута висока цена. Ґенерално, ми маме велї атрактивни локални медиї. Маме поведяме ТВ Краґуєвац, котра барз атрактивна телевизия, маме ТВ Аполо котри тиж так атрактивни без огляду на то же нє ма фреквенцию, та вец Студио Б. Хвильково и так нїхто у держави нє ма леґалну фреквенцию окрем РТС-а. Пре то медиї без фрелквенциї нє маю утрати у одношеню на даєдни други, значи шицки у истей ситуациї. Ми думаме же би було лєпше кед би ше приватизовали тераз и кед би през приватизацию здобули капитал за опрему зоз чим би мали векши шанси за фреквенцию.
Питанє зоз публики:
Алє хто би укладал до таких медийох, без фреквенциї, зоз нєвидомосцу?
Драґан Босилькич:
Чи єст даґдзе бизнису без ризику, питам я вас!
Слободан Дьорич:
Кед уж бешедиєме о тим чи приватизовац електронски медиї зоз дозволу чи без нєй, ми зоз Совиту републичней радио-дифузней аґенциї були процив того же би ше општински станици приватизовали без дозволи за фреквенцию, односно без конкурсного поступку. Гевтот хто купує може купиц и мачку у меху. Медзитим єдна локална станица може буц тунша, а може буц и драгша. Праве зме прето и превжали инициятиву же би ше законодавцу предложело же би померел рок за приватизацию - нє пре то же би зме застановели приватизацию, вона би и так могла рушиц о даскельо днї, алє пре єдну єдноставну причину: Закон о радиодифузиї од 2002. року, кеди є прилапени, анї дзень нєшка нє почал жиц. Цо ше дотика емитерох, вон мертве слово на паперу. Пре то, кед ше уж пожнї три роки, за тот период би требало предлужиц рижни роки, та и рок за приватизацию медийох.
Мушим повесц же право на фреквенцию нє значи лєм право на фреквенцию, алє и допущенє за роботу. А допущенє за роботу сотримує и обласц покриваня, сервисну зону, медийне и огласне тарговище. Тиж так, ище ма буц одредзене чи, поведзме у Новим Садзе будзе два чи дванац ТВ станици. Шицко то битни елементи за виробок бизнис-плану, односно то податки без котрих нє можлїве направиц бизнис план и преценїц вредносц даєдного медию. Окрем того битне и то яки буду стандарди котри РРА розпише емитером же би вони вообще огли и висц на тендер за фреквенциї, а єст и други питаня на котри буци купец нє ма нїяки одвит. Думаме же пре то цени медийох буду барз нїски, праве пре то же єст вельо нєвидомосци. Без дозволи шицко остава лєм старе желєзо.
Обовязка гевтого хто купи станицу же би ю пейц роки отримовал п концепциї котру вона и по теди мала, и то барз битне за новинарох, поготов за преставительох националних меншинох. Друга обоязка же би после приватизациї станица участвовала на конкурсу за фреквенциї. Медзитим нє можлїве обовязац гевтого хто купи станицу же би фреквенцию и достал. Так зме ше нащли у ситуациї же ше гевтот хто наисце сце робиц у радиодифузиї будзе намагац же би задоволєл конкурсни условия и же би достал дозволу за емитованє, алє источашнє, гевтот хто купел станицу пре даяку другу причину - треба му будимок лєбо дацо инше - будзе ше намагац же би дозволу нє достал. Пре то нє будзе у можлївосци же би випочитовал обовязки. И то можлїве по закону. Значи питанє авантуристики хто ше влапи до приватизациї под такима условиями. Чи то будзе конзорциюм новинарох, односно запошлєних, чи конкуренция котра купи станицу же би ю после заварла?!
(...)
Драґан Миланович Пилац:
Синдикати вше на концу, а вони бешедую гевто цо би требало интересовац запошлєних, а нє гевто на цо можу уплївовац. Запошлєни можу кед ше случи приватизация медийох зоз вихасновац гевто цо им Закон о роботи, котри дава вельки можлївосци, и нагнац своїх роботодавцох же би почитовали их права. Европска директива число 2001/23 ушорює права запошлєних и обовязки роботодавцох кед ше случи пременка власнїка и статусна пременка подприємства, и то нашо законодавство муши почитовац. Воно то убудовало до процедури котру дефинує Закон о роботи у членох од 148. по 153, котри дефиную цо нови роботодавец у одношеню на претходного муши почитовац. А то шицки опщи акта, скорей чицкого колективни контракт. Нови роботодавец муши применьовац колективни контракт рок днї по приватизациї лєбо по конєц важеня контракта. То битне пре то же колективни контракт сотримує, под єден, плацу занятих, потим их права на роботни час, и так далєй. Велї останю без роботи, а колективни контракт може дефиновац лєпши условия за гевтих котри постаню технолоґийни вишок.
Барз битне и то же постї обовязка новог роботодавца же би консултовал репрезентативни синдикат и же би го обвисцел о каждей пременки у подприємстве, без огляду на то чи слово о статусней, орґанизацийней чи финансийней пременки. А кед нєт синдикату, роботодавец длужни лєм обвисциц роботнїкох же зробел то и то, и ту ше закончує його обовязка. Историйна нагода то же ше хвилькови роботодавец и роботнїци находза у истим кошару. Пре то, поручуєм терашнїм роботодавцом и новинаром - направце колективни контракти и формуйце, кед же нє маце, синдикат. Направце репрезентативни синдикат у фирми, так голєм рок днї будзеце защицени и годни сце ше прилагодяиц новому тайкуну, котри - то мушице знац - нє будзе мац милосци спрам вас. Кед же то нє маце, гевтей хвильки кед сцигнє нови роботодавец, тей хвильки сце без було якого права. А нови роботодавецнє зосце подписац нови колективни контракт - то искуствиє котре ми маме у потерашнєй приватизациї.
|
